وجع الناس

قالولى شعرك حزين
وكلامه بيمس القلب
بإحساس

دا وجعك الى خلاك تصرخ 
مش مجرد شعر وخلاص

أنا دايس فيكى يادنيا 
وعايش حكاويكى
دامش وجعى أنا 
 دا وجع الناس

همومك كتير 
وجدرانك منحوتة شجن
وأنين وبسمة مرسومة 
بقلم رصاص

مكتبش إزاى ؟
والصدق مفيش 
والحب فنى

ومحبوسين فى غابة 
مفيهاش حراس

مصرخش إزاى ؟
بوجع الناس
وأنا سامع آهاات 
من القلب مدبوحة 

ولا هعيش وخلاص
أعمى العين وبقلب نحاس

دا فى عرف البنى آدمين
الفرح  يوم 
والحزن مرارة سنين 
بيدور علينا بالكاس

وأنا أبقى مين ؟
أنا قلبى مات من سنين
الجرح للعايشين 
المظلومين  المطحونين 

وقلوبهم فوق للجرح وناس

أنا الى عايشهم 
بكتب بدمعى ألمهم 
مأنا لازم أخفف عنهم و
أهو يبقى لكلامى أساس

إسالو عنى المجروحين 
المخدوعين العاشقين
التايهين 
ال خابطهم  الزمان بالفاس

دقوا كل باب 
هتلاقوا الجواب 
نفس الجواب 
قصة متعاده فكل حكاية
مكتوبة فى الكراس

فتشوا فشروخ وجروح الماضى 
هتعرفوا انه ملوش دوا
ولا قاضى 
وداير على كل الناس

وبكرة هتتعاد مع ناس تانية
بوشوش تانية 
نفس الجروح تنزف الم 

وهيفضل يعاند فينا الزمن 
طول مافينا انفاس

دامش وجعى أنا 
ولا جرحى أنا 
دى هموم 
ودموع الناس
كل الناس